Hlaup eflir ekki bara líkamlega heilsu heldur stuðlar jafnframt að bættri andlegri líðan.
Hlaup eru tiltölulega einföld íþrótt í þeim skilningi að það þarf ekki mikið meira til en góða skó og vilja – tiltölulega ódýr líkamsrækt! Æfingar geta farið nánast hvar sem er fram hvort heldur á malbiki, malarstíg, túnum eða utan alfaraleiða.
Að hlaupa saman er hvers manns gaman og góður félagsskapur eflir andlega líðan. Á meðal aðildarfélaga FRÍ eru starfandi fjölmargir skokkhópar sem hittast reglulega með og án þjálfara, auk þess sem margir þeirra bjóða upp á sérstök nýliðanámskeið. Hvergi birtist fegurð fjölbreytileikans í íþróttunum skýrar en einmitt í almenningshlaupunum og í skokkhópum landsins!
Frjálsíþróttasamband Íslands hvetur landsmenn til þess að reima á sig skóna og gera hlaup hluta af sínum lífsstíl. Hér fyrir neðan eru æfingaáætlanir sem eiga erindi hvort heldur fyrir þá sem hafa engan grunn eða fyrir hlaupara sem hafa góðan grunn en vilja komast hraðar yfir.
Æfingaáætlanir
- Sjö vikna gönguþjálfun áður en farið er að hlaupa. Fyrir þá sem ekki hafa verið að hreyfa sig. Tilgangurinn er að venja líkamann við reglulega hreyfingu og koma í veg fyrir meiðsl þegar byrjað er að hlaupa.
- Sjö vikna grunnþjálfun í hlaupum. Fyrir þá sem hreyfa sig reglulega eða hafa lokið sjö vikna gönguþjálfun. Tilgangurinn er að venja líkamann við álagið sem fylgir hlaupum.
- Úr grunnþjálfun í 5km hlaup á sjö vikum. Fyrir þá sem stefna á að hlaupa 5 km á þess að stoppa.
- Úr 5 km upp í 10 km á sjö vikum. Fyrir þá sem stefna á að hlaupa 10 km án þess að stoppa.
- Átta vikna æfingaáætlun til að auka hraða. Fyrir þá sem geta hlaupið 10 km án þess að stoppa og vilja auka hraðan.