Um helgina fór fram MÍ í fjölþrautum og eldri aldursflokkum. Þorleifur Einar Leifsson varð Íslandsmeistari í fjölþraut karla á nýju persónulegu meti með 5182 stig. Á MÍ í eldri aldursflokkum voru um 60 keppendur frá 16 félögum. Hafsteinn Óskarsson (ÍR) setti Norðurlandamet í 800m hlaupi í flokki 65-69 ára á tímanum 2:24,65 mín. Á Íslandi keppir hann í flokki 60-64 ára en á Norðurlöndunum er önnur aldursflokkaskipting í gildi og árið telur. Mótið gekk vel og náðist glæsilegur árangur. Hægt er að lesa nánar um MÍ helgina hér.
Blikinn Bergur Hallgrímsson sigraði 200m hlaup í flokki 40-45 ára á Belgian Masters Championships um helgina og bætti með því aldursflokkametið í greininni. Hann hljóp á 23,55 sek. en fyrra metið átti Ólafur Guðmundsson (HSK/Selfoss) og var það 24,03 sek. frá árinu 2010.
Elísabet Rut Rúnarsdóttir (ÍR) keppti í lóðkasti á Sun Belt Indoor Championships og hafnaði í öðru sæti á nýju persónulegu meti. Hún kastaði 20,80 m.
Guðni Valur Guðnason (ÍR) keppti í kringlukasti innanhúss fyrir helgi á Diskustävling í Vaxjö í Svíþjóð. Hann hafnaði í fyrsta sæti með kasti upp á 59,54 m.
Lúkas Konráðsson (ÍR) keppti um helgina í 400m á Saddle Up Invitational. Hann var þriðji í mark og hljóp á 52:25 sek. sem er persónulegt met.
Framundan
Fimmtudaginn 29. febrúar fer þriðji hluti Nike mótaraðar FH fram í Kaplakrika.
Heimsmeistaramótið innanhúss fer fram um næstu helgi, 1.-3. mars í Glasgow, Skotlandi. Þar verður Erna Sóley Gunnarsdóttir (ÍR) á meðal keppenda. Hægt er að lesa nánar um það hér.
Næstu mót
| Dagsetning | Mót | Staður |
| 29. febrúar | 3. nike mót FH | Kaplakriki |
| 1.-3. mars | HM innanhúss | Glasgow, Skotland |
| 3. mars | Héraðsleikar HSK | Selfosshöll |
| 3.mars | Héraðsmót HSK | Selfosshöll |
| 9.-10. mars | Vetrarkastmótið | Leiria, Portúgal |