Baldvin Þór Magnússon (UFA) keppti í gær til úrslita í 3000 metra hlaupi á heimsmeistaramótinu í Belgrad í Serbíu. Hann hafnaði í 14. sæti og kom í mark á tímanum 8:04,77 mín.
„Þetta er búin að vera frábær reynsla og mjög mikilvæg upp á framtíðina, að læra á hvernig þetta allt er og fá að upplifa þetta. Að fá að finna hvernig það er að komast í úrslit og svo að finna hvernig það er að keppa í úrslitum. Þetta var reynsla sem ég læri af,“ sagði Baldvin Þór í samtali við Morgunblaðið.
Guðbjörg Jóna Bjarnadóttir (ÍR) keppti í undanrásum í 60 metra hlaupi á laugardag og kom í mark á tímanum 7,47 sek sem er aðeins fjórum hundruðustu frá Íslandsmeti hennar í greininni sem hún setti í janúar. Hún varð í sjöunda sæti í sínum riðli.
„Það helsta sem ég tók frá þessu móti var að reyna njóta augnabliksins og taka allt inn. Síðan reyndi ég líka bara ekki að pæla í hinum stelpunum því það gerir mig mjög stressaða heldur bara reyna að pæla í sjálfri mér“ sagði Guðbjörg.
