Sjö mótsmet á fyrri degi MÍ 15-22 ára

Fyrri dagur Meistaramóts Íslands 15-22 ára fór fram í Kaplakrika í dag. Sjö mótsmet féllu á þessum fyrri degi og voru fjölmargir að bæta sín persónuleg met. Heildarstigakeppnina leiðir ÍR með 225,5 stig, Breiðablik í öðru sæti með 157,5 stig og HSK/Selfoss í því þriðja með 140,5 stig. Flestu gullverðlaun hafa farið til ÍR-inga eða þrettán talsins.

Í 60 metra hlaupi pilta 16-17 ára sigraði Birnir Vagn Finnsson, UFA. Hann kom í mark á 7,18 sekúndum sem er nýtt mótsmet og persónulegt met. Birnir var ekki sá einu sem bætti sig í þessu hlaupi því sex af átta keppendum sem kepptu til úrslita voru að bæta sín persónulegu met.

Tvö önnur mótsmet komu í 60 metra hlaupi í dag og því þrjú í heildina. Ólíver Máni Samúelsson, Ármanni, kom fyrstur í mark á nýju mótsmeti í flokki pilta 18-19 ára. Tími Ólívers í hlaupinu var 7,08 sekúndur og var Ólíver að bæta sig. Guðbjörg Jóna Bjarnadóttir sigraði í 60 metra hlaupi stúlkna 18-19 ára á 7,50 sekúndum. Íslandsmet Guðbjargar Jónu og Tiönu Óskar Whitworth í greininni er 7,47 sekúndur og Guðbjörg því alveg við sinn besta tíma.

Í hástökki stúlkna 16-17 ára stökk Eva María Baldursdóttir, HSK/Selfoss, hæst allra keppenda þegar hún stökk yfir 1,72 metra. Það er nýtt mótsmet hjá Evu Maríu. Í flokki stúlkna 18-19 ára var líka sett mótsmet. Það var Birna Kristín Kristjánsdóttir sem gerði það þegar hún stökk yfir 1,68 metra. Í hástökki pilta 16-17 ára sigraði Kristján Viggó Sigfinnsson, Ármanni, 2,08 metra sem er mótsmet. Kristján Viggó reyndi í kjölfarið við 2,15 metra en rétt svo felldi þá hæð. Kristján bætti aldursflokkametið í greinni síðastliðna helgi þegar hann stökk yfir 2,13 metra.

Í 300 metra hlaupi 15 ára stúlkna kom Dóra Fríða Orradóttir, ÍR, fyrst í mark á 43,33 sekúndum. Það er nýtt mótsmet og persónulegt met hjá Dóru Fríðu.

Hér má sjá öll úrslit fyrri dags á Meistaramóti Íslands 15-22 ára.