Á morgun fer fram Meistaramót Íslands í 10 km götuhlaupi samhliða Ármannshlaupinu. Hlaupið hefur í gegnum árin verið þekkt fyrir flata og hraða braut þar sem margir hlauparar hafa náð sínum besta tíma. Framkvæmd hlaupsins er í höndum frjálsíþróttadeildar Ármanns.
Ræst er í Skarfagörðum klukkan 20:00. Þaðan er hlaupið um Klettagarða, inn Korngarða aftur að Skarðagörðum. Þaðan er haldið á göngustíg sem liggur upp Lauganesið að Sæbraut og hlaupið á göngustíg að Hörpu. Þar er snúið við og hlaupið á hjólastíg til baka aftur. Sama leið er hlaupin frá Laugarnesi og niður í Skarfagarða þar sem endamarkið stendur við verslun Icewear. Brautin er bein, hröð og afar flöt.
Afhending keppnisnúmera fer fram dagana 4. og 5. júlí milli kl. 16:00 – 18:00 í Ármannsheimilinu Engjavegi 7, 104 Reykjavík.
Einnig verður hægt að nálgast hlaupanúmer á hlaupadegi milli kl. 16:00-19:00 í námunda við rásmarkið í Skarfagörðum.
Keppt er til verðlauna í eftirfarandi aldursflokkum:
- 18 ára og yngri
- 19-29 ára
- 30-39 ára
- 40-49 ára
- 50-59 ára
- 60-69 ára
- 70 ára og eldri
Heimasíðu mótsins má finna hér. Úrslit hlaupsins í rauntíma má finna hér.
