Vel heppnað 62. ársþing FRÍ haldið í Hafnarfirði

Þann 2. október síðastliðinn var haldið í Kaplakrika í Hafnarfirði 62. ársþing FRÍ í góðu samstarfi við frjálsíþróttadeild FH og Hafnarfjarðarbæ. Þingið var óvanalegt á margan hátt. Því hafði tvívegis verið frestað áður en var nú haldið í skugga COVID en þannig að sóttvarnir voru í hávegum hafðar. Brotið var blað með beinu streymi frá þinginu sem og því að ársþingið tók aðeins einn dag, en ekki tvo, líkt og jafnan hefur áður hefur verið.

Freyr Ólafsson formaður FRÍ bauð gesti velkomna klukkan 17:00 og setti þingið. Þingforsetar voru kjörnir þeir Gunnlaugur Júlíusson og Gunnar Svavarsson, sem steig inn í fjarveru Bjargar Ágústsdóttur. Þingritarar voru kjörin þau Aðalbjörg Hafsteinsdóttir og Eiríkur Mörk Valsson.

Góðir gestir ávörpuðu þingið en það voru þau Lilja Dögg Alfreðsdóttir mennta- og menningarmálaráðherra, Ágúst Bjarni Garðarsson formaður bæjarráðs Hafnarfjarðar, Hafsteinn Pálsson annar varaforseti ÍSÍ og Úlfar Linnet formaður frjálsíþróttadeildar FH.

Á þinginu voru þrír leiðtogar úr hreyfingunni til áratuga gerð að heiðursfélögum FRÍ. Það voru þau Ragnheiður Ólafsdóttir, Þorsteinn Þorsteinsson og Þráinn Hafsteinsson. Ýmsar aðrar heiðursviðurkenningar voru veittar, nánar verður fjallað um heiðursveitingar í sér frétt hér á síðunni.

Á þinginu voru afgreiddar 25 tillögur um reglugerða- og lagabreytingar. Vegna fyrirkomulags þings var mörgum vísað áfram til stjórnar eða starfsnefnda. 

Á þinginu var kjörin ný stjórn og formenn nefnda sambandsins. Ný inn í aðalstjórn kemur Aðalbjörg Hafsteinsdóttir, en áfram sitja Guðlaug Baldvinsdóttir, Gunnar Svavarsson og Kári Steinn Karlsson. Formaður sambandsins, Freyr Ólafsson, var endurkjörinn til næstu tveggja ára.

Eins og áður sagði var þingið haldið í samstarfi við FH og Hafnarfjarðarbæ. Þinggestir nutu gestrisni frjálsíþróttadeildar FH sem og Hafnarfjarðarbæjar sem bauð upp á glæsilegan kvöldmat sem var mikilvæg hressing fyrir þinggesti í erilsömum nefndarstörfum áður en þinginu lauk á réttum tíma klukkan 21.


Á þinginu var einnig kynnt nýtt auðkennismerki og ásýnd fyrir nýja tíma. Kynningarmyndband fyrir nýtt merki má sjá hér að neðan.

Hér fyrir neðan má sjá upptöku frá þinginu.

Fleiri myndir frá þinginu má nálgast hér.