Seinni dagur Meistaramóts Íslands

Seinni degi á Meistaramóti Íslands í frjálsum íþróttum er nú lokið.

Sveit ÍR varð Íslands­meist­ari í 4×400 metra hlaupi kvenna þegar þær komu í mark á tímanum 4:01,80 mín­út­ur. Sveit­ina skipuðu Ingi­björg Sig­urðardótt­ir, Iðunn Björg Arn­alds­dótt­ir, Hrafn­hild Eir R. Hermóðsdótt­ir og Guðbjörg Jóna Bjarna­dótt­ir. Katla Rut Roberts­dótt­ir Klu­vers, Sara Hlín Jó­hanns­dótt­ir, Agla María Kristjáns­dótt­ir og Kolfinna Ýr Kar­els­dótt­ir í sveit Breiðabliks urðu í öðru sæti. Hjá körl­un­um komu ÍR-ing­ar einnig fyrst­ir í mark á 3:26,33 mín­út­um. Sveit­ina skipuðu Þor­vald­ur Tumi Bald­urs, Úlfur Árna­son, Sæmund­ur Ólafs og Ívar Krist­inn Ja­son­ar­son. Sveit UMSS varð önn­ur og sveit Breiðabliks hafnaði í þriðja sæti.

Jón Bjarni Braga­son varð Íslands­meist­ari í kringlukasti er hann kastaði 43,82 metra þegar hann kastaði rétt rúmum sentí­metra lengra en Mím­ir Sig­urðsson sem varð ann­ar. Vil­hjálm­ur Árni Garðars­son varð í þriðja sæti. Thelma Lind Kristjánsdóttir sigraði í kvennaflokki og Ásdís Hjálmsdóttir varð önnur.

Í þrístökki kvenna sigraði Hafdís Sigurðardóttir þegar hún stökk lengst 12,07 metra. Hafdís var einnig Íslandsmeistari í langstökki í gær. Í karlaflokki stökk Bjarki Rún­ar Krist­ins­son lengst. Hans lengsta stökk var 14,19 metr­ar. Rag­ú­el Pino Al­ex­and­ers­son varð ann­ar á 13,25 metra og Birg­ir Jó­hann­es Jóns­son stökk 13,07 og hafnaði í þriðja sæti.

Ívar Krist­inn Ja­son­ar­son kom lang­fyrst­ur í mark í 400 metra grinda­hlaupi karla. Hann hljóp á 52,15 sek­únd­um og var rúm­um fimm sek­únd­um á und­an Árna Hauki Árna­syni sem varð ann­ar og Dag­ur Fann­ar Ein­ars­son hafnaði í þriðja sæti. Þór­dís Eva Steins­dótt­ir vann 400 metra grinda­hlaup kvenna þegar hún hljóp á 62,70 sek­únd­um. Fjóla Signý Hann­es­dótt­ir hafnaði í öðru sæti. Sara Hlín Jó­hanns­dótt­ir varð þriðja.

Ingi­björg Sig­urðardótt­ir sigraði í 800 metra hlaupi kvenna. Hún kom í mark á 2:20,27 mín­út­um. Berg­lind Björk Guðmunds­dótt­ir hafnaði í öðru sæti og Iðunn Björg Arn­alds­dótt­ir tók þriðja sætið. Í karla­flokki vann Krist­inn Þór Krist­ins­son á 1:52:50 mín­útu, Sæmund­ur Ólafs­son varð ann­ar og Bjart­mar Örnu­son hafnaði í þriðja sæti.

Andrea Kol­beins­dótt­ir vann 3.000 metra hlaup kvenna á 10:14,17 mín­út­um og Arn­ar Pét­urs­son vann 5.000 metra hlaup á 15:19,40 mín­út­um.

Hilmar Örn Jónsson og Vigdís Jónsdóttir urðu Íslandsmeistarar í fyrra og það sama var uppi á teningnum í ár. Hilm­ar Örn kastaði lengst 64,21 metra sem er nokkuð frá hans besta en nóg til þess að sigra. Vil­hjálm­ur Árni Garðars­son varð ann­ar með kast upp á 54,92 metra og Axel Máni Stein­ars­son endaði í þriðja sæti. Í kvennaflokki kastaði Vig­dís Jóns­dótt­ir 58,59 metra sem er nýtt móts­met. Elísa­bet Rut Rún­ars­dótt­ir kastaði 50,80 metra og varð önn­ur og í þriðja sæti varð Rut Tryggva­dótt­ir með kast upp á 43,43 metra.

Jó­hann Björn Sig­ur­björns­son kom fyrst­ur í mark í 200 metra hlaupi karla á tím­an­um 21,54 sek­únd­ur. Arn­ar Val­ur Vign­is­son kom þar á eft­ir á 22,67 sek­únd­um og Ein­ar Már Óskars­son varð þriðji á 22,86 sek­únd­um. Guðbjörg Jóna Bjarna­dótt­ir kom fyrst í mark í kvennaflokki á tím­an­um 23,89 sek­únd­um. Tiana Ósk Whitworth, sem varð Íslands­meist­ari í 100 metra hlaupi í hafnaði í öðru sæti á 24,37 sek­únd­um og eins og í 100 metra hlaup­inu var það Hrafn­hild Eir R. Hermóðsdótt­ir sem hafnaði í þriðja sæti á 24,43 sek­únd­um.

Ingi Rún­ar Krist­ins­son vann stang­ar­stökkið. Hann stökk 4,42 metra á meðan Ari Sigþór Ei­ríks­son stökk 4,32 og hafnaði í öðru sæti. Gunn­ar Eyj­ólfs­son stökk 4,22 metra og hafnaði í þriðja sæti.

Myndir frá mótinu sem teknar voru af Gunnlaugi Júlíussyni má finna hér.