Óskar Hlynsson er Fjölnismaður ársins

Val á Fjölnisfólki ársins fór fram í Egilshöll föstudaginn 29. des sl. Óskar Hlynsson yfirþjálfari frjálsíþróttadeildarinnar var valinn Fjölnismaður ársins. Afreksfólk deildarinnar voru valin Arndís Ýr Hafþórsdóttir og Bjarni Anton Theódórsson.

Óskar hefur starfað sem þjálfari hjá Frjálsíþróttadeild Fjölnis í mörg ár. Síðustu ár hefur hann verið yfirþjálfari deildarinnar. Sem þjálfari hefur hann haft mikil áhrif á þau ungmenni sem hafa lagt stund á frjálsar íþróttir hjá félaginu og smitað þau af sínum mikla áhuga á íþróttinni. Árið 2011 hlaut Óskar silfurmerki Fjölnis og árið 2017 hlaut hann gullmerki félagsins. Óskar hefur unnið mikið sjálfboðaliðastarf fyrir frjálsíþróttadeildina t.d. á ýmsum mótum og á öðrum fjáröflunum fyrir deildina. Hann hefur komið að skipulagningu ýmissa viðburða á vegum deildarinnar og er alltaf tilbúinn að greiða götu þeirra sem þurfa á hans aðstoð að halda og gildir það bæði fyrir fólk innan frjálsíþróttadeildarinnar og annarra deilda félagsins.

Arndís Ýr hefur verið fremsti langhlaupari landsins í kvennaflokki undanfarin ár og stóð hún sig sérstaklega vel á þessu ári. Hún keppti á Smáþjóðaleikunum sem fram fóru í San Marino og sigraði þar í 10.000 m hlaupi á tímanum 36:59,69 sem er hennar besti tími í vegalengdinni. Hún keppti einnig á Evrópukeppni landsliða og bætti þar árangur sinn í 5000m hlaupi á tímanum 17:14,16. Hún hefur verið fremsta konan í götuhlaupum hérlendis um allnokkurt skeið og bætti sinn persónulega árangur í 5 km götuhlaupi í mars.

Bjarni Anton er 19 ára gamall en er einn af fremstu 400 m hlaupurum landsins. Hann náði besta árangri ársins í sínum aldursflokki í 400m hlaupi innanhúss þegar hann varð í 2. sæti á Meistaramóti Íslands í febrúar á tímanum 49,74 sek. Hann sigraði í 400m hlaupi á Stórmóti ÍR og sigraði í sínum aldursflokki á Meistaramóti Íslands 15-22 ára bæði innanhúss og utanhúss í 400 m hlaupi.

Frjálsíþróttasamband Íslands óskar þeim innilega til hamingju!

Hér að neðan má sjá mynd af Arndísi, Óskari og Bjarna með viðurkenningarnar.