Ólympíufarar og Íslandsmethafar á Meistaramóti Íslands

Helgina 13.-14. júlí fer fram Meistaramót Íslands í frjálsíþróttum. Mótið fer fram á sjálfum þjóðarleikvangi Íslands, Laugardalsvellinum. Fremsta frjálsíþróttafólk landsins verður samankomið og mun keppa um 37 Íslandsmeistaratitla. Fyrsta grein mótsins er 110 metra grindarhlaup og sú síðasta 4×400 metra boðhlaup þar sem spennan er yfirleitt mjög mikil. Alls eru 187 keppendur frá sextán félögum skráðir til keppni.

Hraðasta fólk Íslandssögunnar 

Í 100 og 200 metra hlaupi karla og kvenna er mikið um sterka keppendur. ÍR-ingarnir Guðbjörg Jóna Bjarnadóttir og Tiana Ósk Whitworth brutu blað í sögunni fyrir tveimur vikum þegar þær hlupu hvor um sig tvisvar sinnum undir Íslandsmetinu í 100 metra hlaupi, sem staðið hafði í fimmtán ár, á sterku móti út í Þýskalandi. Tiana Ósk byrjaði á því að bæta Íslandsmetið í undanrásunum og Guðbjörg Jóna bætti það svo aftur rúmum klukkutíma síðar í úrslitahlaupinu. Um helgina munu þær keppa í sitthvorri greininni í undirbúningi sínum fyrir EM U20 sem fram fer í næstu viku. Tiana Ósk keppir í 100 metra hlaupi og Guðbjörg Jóna í 200 metra hlaupi.

Hjá körlunum má búast við spennandi hlaupum. Íslandsmethafinn í 100 metra hlaupi, Ari Bragi Kárason úr FH er mættur aftur á brautina eftir meiðsli. Hann mun þar mæta ríkjandi Íslandsmeistaranum í greininni, Jóhanni Birni Sigurbjörnssyni úr UMSS. Á meðal keppenda er einnig Kolbeinn Höður Gunnarsson, FH. Kolbeinn á Íslandsmetið í 200 metra hlaupi og muni því klárlega veita Ara Braga og Jóhanni Birni harða samkeppni í 100 metra hlaupinu ásamt því að vera sigurstranglegur í 200 metrunum. Þeir eru allir þrír á meðal tíu bestu 100 metra og 200 metra spretthlaupurum Íslands frá upphafi og ef aðstæður eru góðar gætu hlaupin um helgina orðið með þeim hröðustu í sögunni.

Úrslitin í 100 metra hlaupi kvenna fara fram klukkan 13:40 á laugardeginum og klukkan 13:50 hjá körlunum sama dag. Á sunnudeginum fara 200 metra hlaupin fram. Konurnar keppa til úrslita klukkan 14:00 og karlarnir 14:10.

Ólympíufarar á Laugardalsvellinum

Þrátt fyrir að við Íslendingar séum fámenn þjóð þá stefnum við á að vera í heimsklassa í því sem við tökum okkur fyrir hendur. Það sama á við þegar kemur að íþróttum enda búum við yfir frábæru íþróttafólki. Á MÍ um helgina verða tveir íslenskir Ólympíufarar. Það eru þau Aníta Hinriksdóttir og Guðni Valur Guðnason sem keppa bæði fyrir ÍR. Aníta keppir í 800 metra hlaupi og Guðni Valur í kringlukasti. Þau eru bæði á meðal þeirra fremstu í sinni grein í heiminum, Aníta er að auki Íslandsmethafi í sinni grein og Guðni er í öðru sæti afrekalistans. Auk þess að keppa í sinni sterkustu grein þá mun Aníta einnig keppa í 1500 metra hlaupi og Guðni Valur í kúluvarpi. 

Aníta keppir í 1500 metra hlaupi klukkan 13:40 á laugardeginum og í 800 metra hlaupi klukkan 13:30 á sunnudeginum. Kúluvarp karla fer fram klukkan 14 á laugardeginum og kringlukastið 12:30 á sunnudeginum. 

Verðlaunahafi frá bandaríska háskólameistaramótinu

Sífellt fleira íslenskt frjálsíþróttafólk heldur til Bandaríkjanna til þess að sæka sér menntun og verða betri íþróttamenn. Tveir þeirra eru FH-ingarnir Hilmar Örn Jónsson sem varð þriðji á bandaríska háskólameistaramótinu í sleggjukasti og Sindri Hrafnsson sem varð fjórði á sama móti í spjótkasti. Hilmar Örn bæti Íslandsmetið í sleggjukasti í vor og Sindri er í þriðja sæti afrekalistans í spjótkasti. Auk þeirra tveggja verða ÍR-ingarnir Thelma Lind Kristjánsdóttir og Erna Sóley Gunnarsdóttir á meðal keppenda. Thelma Lind á Íslandsmetið í kringlukasti og Erna Sóley hefur verið að færast upp afrekalistann í kúluvarpi. Hún situr nú í öðru sæti afrekalistans og er aðeins þrjátíu sentimetrum frá Íslandsmetinu. Thelma hafði náð lágmarki á EM U23 í sumar en tekur ekki þátt vegna meiðsla og Erna Sóley mun keppa á EM U20 síðar í sumar. 

Spjótkast karla og kúluvarp kvenna fara fram klukkan 12:30 á laugardeginum. Sleggjukast karla og kringlukast kvenna fara fram klukkan 14 á sunnudeginum.

Fremstu ungmenni Evrópu

Mikið af ungu og efnilegu íslensku frjálsíþróttafólki hefur verið að ná frábærum árangri undanfarið og um helgina keppa fimm ungmenni sem eru á meðal tíu bestu í sínum aldursflokki í Evrópu. Auk Guðbjargar Jónu, Tiönu Óskar og Ernu Sóleyjar sem minnst hefur verið á hér að ofan eru það Birna Kristín Kristjánsdóttir, Breiðablik og Valdimar Hjalti Erlendsson, FH. 

Birna Kristín

Sterkasta grein Birnu Kristínar er langstökk. Hún á aldursflokkamet 16-17 ára í greininni og var sú yngsta til þess að stökkva yfir sex metra. Birna mun keppa á Ólympíuhátið Evrópuæskunnar síðar í sumar. Valdimar Hjalti er ungur kringlukastari og hefur stöðugt verið að bæta sig undanfarna mánuði. Hann er frekar nýr í greininni en er þrátt fyrir það komin í hóp fremstu kringlukastara Evrópu í sínum aldursflokki. Hann mun keppa á EM undir 20 ára í næstu viku. 

Valdimar Hjalti

Forkeppni langstökks kvenna hefst á sunnudeginum klukkan 12 og úrslitin klukkan 14:05. 

Íþróttir eru óútreiknanlegar og ekki er hægt að krýna sigurvegara fyrirfram. Þegar keppendurnir mæta á brautina eru allir jafnir og allt getur gerst. Það er nákvæmlega það sem gerir íþróttir skemmmtilegar. Íslandsmethafar, Ólympíufarar og verðlaunahafar frá sterkum alþjóðlegum mótum verða í Laugardalnum um helgina. Þessir keppendur eru þaulvön því að keppa á stórum leikvangum fyrir framan tugi þúsunda áhorfenda. Það er hægt að treysta því að þau munu öll gera sitt allra besta á stærsta frjálsíþróttamóti sumarsins hér á landi. En nú er þitt tækifæri áhorfandi góður! Frítt verður inn á Laugardalsvöllinn þar sem tækifæri gefst til þess að sjá okkur fremsta íþróttafólk keppa með berum augum. Ef aðstæður leyfa gætum við fengið að sjá Íslandsmet, aldursflokkamet eða mótsmet. Mættu og vertu hluti af sögunni!

Tímaseðil og keppendalista mótsins má sjá hér