Christine og Sigurjón ofurhlauparar ársins 2012

Sigurjón Sigurbjörnsson er félagi nr. 27 í 100 km félaginu. Hann er Íslandsmethafi í 100 km hlaupi.
Sigurjón tók þátt í heimsmeistaramóti í 100 km hlaupi í Sergeno á Norður Ítalíu þann 22. Apríl sl. Sigurjón var elstur keppenda á mótinu en hann er 57 ára gamall. Mótið var jafnframt Evrópumeistaramót í 100 km hlaupi. Sigurjón lauk hlaupinu á tímanum 8.07.43 sem er meðalhraði upp á 4.53 mín á km. Sigurjón varð nr. 69 af 165 sem luku keppni í HM og nr. 56 sæti af 82 sem luku keppni í EM. Þessi árangur skipar Sigurjóni í 199 sæti á heimslista af 5.671 karli sem hefur hlaupið 100 km hlaup á árinu. Eftir aldursleiðréttingu sem fer fram eftir ákveðinni aðferðafræði þar sem tekið er tillit til mismunandi aldurs keppenda er Sigurjón í 33. sæti á heimslista. Hann er í fyrsta sæti á heimslista í aldursflokknum 55-59 ára og í öðru sæti af þeim sem eru 55 ára og eldri. Hann er í tíunda sæti á heimslista yfir þá sem eru 50 ára og eldri. Sigurjón á íslandsmet í 100 km hlaupi sem er 7.59.01 klst.
 
Christine Bucholtz er félagi nr. 30 í félagi 100 km hlaupara. Hún hefur verið að færa sig yfir í lengri vegalengdir eftir að hún lauk 100 km hlaupi á Spáni haustið 2010. Hún hljóp 100 mílna hlaup á Spáni 22. og 23. október 2011 á tímanum 23 klst og 30 mín. Hún lauk áfangahlaupinu GORE-TEX® TRANSALPINE-RUN í september 2012. Það var hlaupið á átta dögum um Þýskaland, Austurríki og Ítalíu. Hlaupið var 320 km langt og samanlögð heildarhækkun var 15.000 metrar. Að lokum hljóp Christine Ultima Frontera í Andalusiu á Spáni dagana 20. og 21. október sl. Það er 166 km langt hlaup í fjalllendi. Alls hófu fjórar konur hlaupið, tvær luku hlaupinu og sigraði Christine á rúmum 26 klst.
 
 
 
 
Share on FacebookShare on Google+Tweet about this on TwitterShare on LinkedIn

FRÍ Author