María Rún og Ísak Óli Íslandsmeistarar

Um helgina fór fram Meistaramót Íslands í fjölþrautum. Fimmtarþraut kvenna lauk í gær þar sem María Rún Gunnlaugsdóttir úr FH sigraði með 3927 stig. Irma Gunnarsdóttir úr Breiðabliki varð í öðru sæti með 3481 stig og Katla Rut Robertsdóttir Kluvers sem einnig keppir fyrir Breiðablik varð í þriðja sæti með 3150 stig.

María Rún Gunnlaugsdóttir

María Rún á best 3940 stig og er hún í þriðja sæti afrekalistans á Íslandi. Íslandsmetið á Helga Margrét Þorsteinsdóttir og er það 4298 stig. Þrautin hófst á 60 metra grindarhlaupi þar sem María sigraði á 8,76 sekúndum og tók hún þar með strax forystuna sem hún hélt allt til loka. Þar næst var komið að hástökki þar sem Maríu hefur gengið vel í vetur og bætt sig tvívegis. Þar stökk hún 1,66 metra og sigraði þá grein. Á Norðurlandamóti innanhúss fyrir viku síðan keppti María í hástökki þar sem hún bætti sinn besta árangur og stökk 1,75 metra. Þriðja grein var kúluvarp þar sem Helga Margrét Haraldsdóttir úr ÍR kastaði lengst. Lengsta kast hennar var 11,93 metrar. Irma varð önnur og María Rún í því þriðja með kast upp á 11,65 metra. María sigraði svo síðustu tvær greinarnar sem voru langstökk og 800 metra hlaup. Hún stökk lengst 5,68 metra og hljóp á 2:24,04 sekúndum. María sigraði því fjórar af fimm greinum.

Ísak Óli Traustason

Í sjöþraut karla sigraði Ísak Óli Traustason, UMSS. Hann endaði með 5344 stig sem er persónuleg bæting hjá honum. Þessi árangur kemur honum upp fyrir Svein Elías Elíasson og Þorstein Ingvarsson á afrekalistanum og er Ísak Óli nú í sjöunda sæti listans. Aðeins einu stigi á eftir Inga Rúnari Kristinssyni. Ísak Óli sigraði í langstökki og 60 metra grindarhlaupi og bætti sinn persónulega árangur í 60 metra hlaupi, stangarstökki og 1000 metra hlaupi. Í grindarhlaupinu jafnaði hann sinn besta árangur. Í öðru sæti í sjöþraut karla varð Benjamín Jóhann Johnsen úr ÍR með 5200 stig og í því þriðja varð Gunnar Eyjólfsson úr UFA með 4746 stig.

Einar Daði Lárusson úr ÍR var meðal keppenda um helgina en hann á næst besta árangur Íslands bæði í sjöþraut og tugþraut. Einar Daði hefur glímt við meiðsli síðastliðin ár en í vetur hefur hann æft hlaup og lyftingar vel. Hann hefur ekkert æft einstaka greinar og ákvað því í samráði við Þráin Hafsteinsson, þjálfara sinn, að sleppa stangarstökkinu. Einar Daði sagðist vilja nýta mótið til þess að prófa sig áfram og virðist hann vera í ágætis standi. Hann komst í gegnum fyrri daginn án þess að finna fyrir gömlum meiðslum og því verður gaman að fylgjast með Einar í sumar.

Í fimmtarþraut stúlkna 16-17 ára sigraði Glódís Edda Þuríðardóttir úr KFA með 3447 stig og í flokki stúlkna 15 ára og yngri sigraði Júlía Kristín Jóhannesdóttir úr Breiðabliki með 2653 stig.

Í sjöþraut pilta 18-19 ára sigraði Ragúel Pino Alexandersson, UFA, með 4265 stig og í flokki pilta 16-17 ára sigraði Dagur Fannar Einarsson, Selfossi, með 4520 stig. Í fimmtarþraut pilta 15 ára og yngri sigraði Sebastian Þór Bjarnason, Selfossi með 2644 stig.