Ívar á flottum tímum Svíþjóð

Hlauparinn Ívar Kristinn Jasonarson æfir og keppir keppir í Svíþjóð samhliða námi og hefur hann verið að gera góða hluti á keppnisbrautinni að undanförnu.  

Ívar keppti í 200 metra hlaupi í Eskilstuna um miðjan júlí. Hann hljóp á 21,95 sek í löglegum meðvind (0,9 m/s), sem er sextándi besti tíminn í Svíþjóð um þessar mundir. Í lok júlí keppti Ívar á spretthlaupsmóti í Sundsvall þar sem hann hljóp 100 metrana á 10,92 sek í 1,9 m/s meðvind. Hann varð annar í sínum riðli og hljóp síðar til úrslita á 10,99 sek (+0,8 m/s). 

Þann 30. júlí hljóp Ívar til sigurs í 400 metra hlaupi í Eskilstuna, á tímanum 48,98 sek en tíminn er sá áttundi besti í Svíþjóð.

Ívar keppti síðan í sænsku bikarkeppninni í Gautaborg 6. ágúst bæði í 200 og 400 metra hlaupi. Ívar hljóp 200 metrana á 21,96 sek í 0,6 m/s mótvindi og varð þriðji og síðar um daginn annar í 400 metrum á 49,05 sek.  

Ívar Kristinn á hröðustu tíma íslenskra karla í ár bæði í 200 og 400 metra hlaupi í löglegum aðstæðum. Í 100 metra hlaupi á hann næst hraðasta tímann í ár en þar er Kolbeinn Höður Gunnarsson efstur á afrekaskránni.