ÍR-ingar bikarmeistarar innanhúss 2014

Bestan árangur dagsins átti Óðinn Björn Þorsteinsson, Ármanni, en þetta var hans fyrsta mót í vetur.  Óðinn varpaði kúlunni 18,81 m og hlaut fyrir það 1050 stig samkvæmt alþjóðlegu stigatöflu IAAF.  Hafdís Sigurðardóttir, Norðurlandi, átti bestan árangur kvenna en hún stökk 6,26 m í langstökki.  Fyrir afrekið hlaut hún 1043 stig.  Hafdís sigraði einnig í 60 m hlaupi og var í sigurveit norðlensku kvennanna í 4×400 m boðhlaupi.  
 
Kristinn Torfason úr FH sigraði æsispennandi langstökkskeppni en hann stökk 1 cm lengra en næsti maður, Þorsteinn Invarsson, ÍR.  Stukkur þeir 7,43 m og 7,42 m.
 
Arna Stefanía Guðmundsdóttir, ÍR sigraði í 400 m hlaupi á tímanum 56,41 s sem er hennar fjórði besti tími frá upphafi innanhúss og sá besti í þrjú ár.
 
Jóhann Björn Sigurbjörnsson úr bikarliði Norðurlands sigraði í 60 m hlaupi á tímanum 6,95 m sem var enn ein bætingin hans í vetur.  Jóhann var einnig í sigursveit Norðurlands í 4×400 m boðhlaupi.
 
Kolbeinn Höður Gunnarsson úr bikarliði Norðurlands sigraði í 200 m hlaupi og 400 m hlaupi í dag.  Hann kom í mark á tímanum 22,01 sek í 200 m hlaupinu og á 48,97 sek í 400 m hlaupinu.
 
Þórdís Eva Steinsdóttir, 14 ára stúlka úr FH, kom sá og sigraði bæði í 800 m hlaupinu og í 1.500 m hlaupi.  Tímar hennar voru 2:18,32 mín og 4:51,00 mín.  Eru þetta jafnframt næst bestu tíma allra kvenna innanhúss í vetur í greinunum.  Það skal einnig tekið fram að Þórdís er nú einnig komin í 9. sæti kvenna í 1.500 m hlaupi frá upphafi innanhúss, og það einungis 14 ára gömul.  
 
Öll úrslit mótsins má sjá á mótasíðu FRÍ 
 
Gunnlaugur Júlíusson tók meðfylgjandi mynd
Share on FacebookShare on Google+Tweet about this on TwitterShare on LinkedIn

FRÍ Author