Heimsmeistaramótið í utanvegahlaupum

Íslenska landsliðið stóð sig frábærlega á heimsmeistaramótinu í utanvegahlaupum sem fór fram laugardaginn 8.júní í Miranda do Corvo í Portúgal.  Hlaupið var um 44km með 2200 metra hækkun í mjög krefjandi landslagi og töluverðum hita. Þátttakendur voru um 450 frá 50 löndum. Frjálsíþróttasamband Íslands sendi 8 hlaupara á mótið , fjóra af hvoru kyni ásamt fylgdarliði.  Árangur liðsins var vonum framar og ljóst að mikil gróska er í utanvegahlaupum á Íslandi sem er að skila sér í sterkari hlaupurum sem hafa fullt erindi í keppni við þá bestu í heiminum.

Íslenska kvennaliðið var skipað þeim Önnu Berglindi Pálmadóttur , sem var fyrst íslenskra kvenna í mark, Rannveigu Oddsdóttur, Melkorku Árný Kvaran og Þórdísi Hrafnkelsdóttur. Kvennaliðið náði mjög góðum árangri á mótinu og kláruðu þær allar hlaupið.  Anna Berglind og Rannveig voru meðal 100 efstu kvenna í mark á sínu fyrsta heimsmeistaramóti en Melkorka kom næst á eftir þeim einnig á sínu fyrsta móti. Íslenska kvennaliðið endaði í 22 sæti í liðakeppninni sem verður að teljast mjög gott enda saman komnar á þessu móti helstu atvinnumenn í greininni.  

Íslenska karlaliðið var reynslumikið og skipað þeim Þorbergi Inga Jónssyni, Sigurjóni Erni Sturlusyni, Ingvari Hjartarsyni og Örvari Steingrímssyni.  Hlaupið fór vel af stað fyrir þá alla en Þorbergur Ingi, okkar allra sterkasti og reynslumesti utanvegahlaupari, slasaðist illa á hné í brautinni og varð að hætta keppni eftir um 16km.  Þeir Sigurjón, Ingvar og Örvar sigldu allir í mark þar sem Sigurjón var rúmri mínútu á undan Ingvari sem þreytti þarna sína fraumraun á heimsmeistaramóti, greinilega mikið efni þar á ferð. Örvar rak síðan smiðshöggðið á mjög góðan árangur karlaliðsins og tryggði íslenska karlaliðinu 28 sæti í liðakeppninni.

Heimsmeistaramótið í utanvegahlaupum er bæði einstaklings- og liðakeppni landsliða.  Til að telja í liðakeppninni þá verður viðkomandi land að skila 3 hlaupurum af hvoru kyni í mark.  Það gerðu íslensku keppendurnir með stæl en það var alls ekki sjálfgefið, því töluvert var um aföll í brautinni enda var hún bæði hröð og krefjandi.  Hlaupaleiðin í ár þótti ein sú tæknilegasta sem boðið hefur verið upp á með mjög erfiðum hækkunum, lækjum og stórgrýti ásamt því að hlauparar fengu eingöngu aðstoð frá sínum liðstjórum á einni drykkjarstöð í brautinni.

Tímar og sæti íslensku keppendanna voru annars eftirfarandi:

Heimsmeistaramótið í Utanvegahlaupum 2019
Miranda do Corvo .  44 km með 2200 m hækkun.
KonurTími sæti
Anna Berglind Pálmadóttir05:1780
Rannveig Oddsdóttir05:2393
Melkorka Árný Kvaran05:39121
Þórdís Jóna Hrafnkelsdóttir05:56136
   
KarlarTími sæti
Sigurjón Ernir Sturluson04:29113
Ingvar Hjartarson 04:31116
Örvar Steingrímsson 04:43140
Þorbergur Ingi Jónsson DNF