Guðbjörg Jóna Bjarnadóttir setti fyrr í kvöld nýtt Íslandsmet í 200 metra hlaupi á Ólympíuleikum ungmenna sem fer fram Argentínu. Guðbjörg hljóp á tímanum 23,55 sekúndum (1,1 m/s í meðvind) og skilaði það henni einnig fyrsta sætinu í fyrri umferð.
Fyrra Íslandsmetið átti Guðbjörg sjálf þegar hún bætti 21 árs gamalt Íslandsmet Guðrúnar Arnadóttur í júní á þessu ári. Þá hljóp hún á 23,61 sekúndu.
Keppnin í frjálsum er með nýstárlegu sniði því samanlagður árangur í tveim umferðum gildir til sigurs á mótinu. Því verður spennandi að fylgjast með Guðbjörgu í seinni umferðinni sem fer fram 16. oktbóber.
Hér að neðan má sjá viðtal sem tekið var við Guðbjörgu fyrir mótið
Tveir aðrir keppendur keppa í frjálsum íþróttum á mótinu. Það eru þau Valdimar Hjalti Erlendsson sem keppir í kringlukasti og Elísabet Rut Rúnarsdóttir sem keppir í sleggjukasti. Valdimar keppir í seinni umferð á morgun, 14. október og Elísabet á mánudaginn 15. október.
