Glæsilegur árangur og góðar framfarir hjá stórum hópi keppenda á fyrri degi MÍ 15-22 ára

Hilmar sem varð sjötti á EM U20 á Ítalíu í sumar með 6kg sleggju kastaði 5kg sleggju 72,06m í Kópavogi í dag en sú þyngd sleggju  tilheyrir hans aldursflokki – flokki 16-17 ára pilta.  Árangur Hilmars í Kópavogi hefði nægt í 11. sætið á Heimsmeistaramóti U18 í Úkraínu í sumar og Íslandsmet hans 73,95m nægt í 6. sætið á því heimsmeistaramóti. Rétt er að geta þess að það magnaða við Hilmar er að hann kastar 6kg sleggjunni litlu skemur (en 5kg sleggjunni) og á best með henni 71,85m. Viðbúið er að Hilmar eigi eftir að kasta langt um næstu helgi á NM U20 í Finnlandi.

Aníta Hinriksdóttir nýkringdur heimsmeistari í flokki U18 og Evrópumeistari í flokki U20 í 800m hlaupi hvíldi sig á þeirri grein í Kópavogi í dag en hljóp þess í stað 400m grindarhlaup, 1:02,79 mín (942 stig), um morguninn, 100m um hádegið og til úrslita í sömu grein kl.13:50. Loks kl. 15:50 hljóp hún svo 400m á tímanum 55.01sek sem er nærri Íslandsmeti hennar 54,29sek í flokkum 16-17ára og 18-19ára sem hún setti á Smáþjóðaleikunum í sumar.  Árangur Anítu í 400m í dag lofar góðu fyrir NM U20 um næstu helgi enda hafði hún enga keppni í Kópavogi og var búinn að hlaupa mikið fyrr um daginn. Á NM U20 un næstu helgi mun Aníta keppa í sinni aðalgrein 800m hlaupi og einnig í  1500m hlaupi og freista þess að bæta Íslandsmet sitt í þeirri grein í flokki 16-17 ára sem er 4:16,51 mín.  Íslandmet fullorðinna í 1500m, 4:14,94 mín, á Ragnheiður Ólafsdóttir yfirþjálfari FH, en hún á jafnframt metið í flokki stúlkna 18-19ára, 4:15,75 mín  sem er glæsilegur árangur enn í dag og var heimsklassa árangur fyrir 32 árum og sjötta hraðasta 1500m hlaup í flokki unglinga (U20) í Evrópu árið 1981 þar bestu menn muna.

Einföld úrslit í dag (3 efstu í grein) má sjá – HÉR http://mot.fri.is/cgi-bin/ibmot/media/vmot2129.htm

Ítarlegar upplýsingar um úrslit má sjá – HÉR  http://mot.fri.is/cgi-bin/ibmot/urslitib2129D1.htm

Share on FacebookShare on Google+Tweet about this on TwitterShare on LinkedIn

FRÍ Author