Frábær árangur á öðrum keppnisdegi Smáþjóðaleikana

Öðrum keppnisdegi á Smáþjóðaleikunum í San Marino lauk í gærkvöldi.

Íslensku keppendurnir stóðu sig með glæsibrag í gær og er Ísland nú sem stendur í 2. sæti frjálsíþróttakeppninnar.

Dagurinn hófst með 400 m grindahlaupi kvenna þar sem Arna Stefanía Guðmundsdóttir sigraði með yfirburðum á tímanum 59,14 sek.

Í kúluvarpi kvenna náði Ásdís Hjálmsdóttir 2. sæti með 15,39 m kasti og Thelma Lind Kristjánsdóttir var í 5. sæti með 13,05 m kast.

Ívar Kristinn Jasonarson keppti í 400m grindahlaupi karla, hann endaði í 2. sæti og hljóp á tímanum 52,67 sek sem er bæting hjá honum um 3/100 úr sekúndu.

María Rún Gunnlaugsdóttir þrautarkona keppti í langstökki kvenna í gær. Lengsta stökk hennar var 5,53 m sem skilaði henni 2. sæti.

Undanúrslit í 200m hlaupi karla fóru fram í gær. Þar voru Ari Bragi Kárason og Kolbeinn Höður Gunnarsson mættir til leiks og tryggðu þeir sér báðir örugglega áfram í úrslitin sem fara fram á morgun. Ari Bragi hljóp á tímanum 22,03 sek og Kolbeinn Höður hljóp á tímanum 21,78 sek.

Í 1500m hlaup karla átti Ísland tvo keppendur, þá Kristin Þór Kristinsson og Bjartmar Örnuson. Hlaupið var taktískt en svo fór að Kristinn náði 5. sætinu á tímanum 4:02,49 mín og Bjartmar endaðu í 7. sæti á tímanum 4:04,61 mín.

Ólympíufarinn Guðni Valur Guðnason var mættur til leiks í kringlukasti karla. Tryggði hann sér sigurinn í annarri tilraun með 59,98 m kasti.

Arndís Ýr Hafþórsdóttir keppti fyrir Íslands hönd í 10.000 m hlaupi kvenna. Arndís leiddi hlaupið frá byrjun en hlaupið var æsispennandi þar sem að saxað var að Arndísi þegar lítið var eftir af hlaupinu. Arndís náði hinsvegar að sýna hvað í henni býr þegar hún náði að slíta sig frá á síðasta hring og sigraði með yfirburðum á tímanum 36:59,69 sek.

Í 400 m hlaupi kvenna hljóp hin unga og efnilega Guðbjörg Jóna Bjarnadóttir til úrslita. Náði hún 2. sæti á tímanum 55,72 sek og bætti sig um 14/100 úr sekúndu.

Í úrslitum í 400 m hlaupi karla var Ívar Kristinn Jasonarson aftur mættur til leiks. Hljóp hann á tímanum 48,28 sek og endaði í 2. sæti.  Virkilega vel gert hjá Ívari að vinna tvenn silfurverðlaun á sama deginum!

Síðasti keppnisdagur frjálsíþróttakeppninnar er á morgun og með góðum árangri á Ísland enn möguleika á sigri í heildarfjölda verðlaunapeninga.

Við minnum á að hægt er að fylgjast með keppninni í gegnum nýtt snapchat Frjálsíþróttasambandsins: fri-snap
Hér er linkur á úrslitasíðu mótsins.
ÁFRAM ÍSLAND!!!
Share on FacebookShare on Google+Tweet about this on TwitterShare on LinkedIn