Eva María bætti 25 ára gamalt aldursflokkamet

Eva María Baldursdóttir bætti aldursflokkamet 16-17 ára stúlkna í hástökki þegar hún stökk yfir 1,81 metra á Hástökksmóti Selfoss. Fyrra metið var 1,80 metra sem Vala Flosadóttir setti árið 1995 og var því orðið 25 ára gamalt.

Eva María átti best 1,78 sentimetra frá því fyrr í sumar og var því að bæta sig um þrjá sentimetra. Með árangrinum er Eva kominn upp í þriðja sæti íslenska afrekalistans frá upphafi en Íslandsmetið er 1,88 metrar sem Þórdís Lilja Gísladóttir setti árið 1990.

Árangur Eva Maríu er sá fimmti besti í Evrópu í ár í flokki stúlkna 17 ára og yngri og sá sjötti besti í heiminum.