Þórey Edda stekkur í Peking í nótt

Þórey Edda Elísdóttir stangarstökkvari úr FH keppir í undankeppni stangarstökksins í Peking í nótt.
36 konur eru skráðar til leiks í Peking og verður keppt í tveimur hópum á sama tíma og hefst keppni kl. 02:10 að íslenskum tíma. Þórey Edda stekkur í B-hópi og er 17 í stökkröð, en 18 keppa í hvorum hópi.
 
Búið er að gefa út að til þess að tryggja sér sæti í úrslitum þurfi að stökkva yfir 4,60 metra, en það er sami árangur og Íslands- og Norðurlandamet Þóreyjar frá árinu 2004. Þórey hefur stokkið yfir 4,30 metra best á þessu ári (Bikarkeppni FRÍ 5. júlí sl.), en hún stökk 4,40m best á sl. ári. 14 konur af þeim sem keppa í nótt eiga betri árangur en Þórey og hafa stokkið best 4,63-5,04 metra.
 
Af þessum keppendum eiga 30 keppendur betri árangur en Þórey á þessu ári, þrjár hafa stokkið jafn hátt og tvær eiga lakari skáðan árangur en Þórey. Yelena Isinbaeva keppir í A-hópi, en heimsmet hennar í greininni frá því fyrr í sumar er 5,04 metrar, en reikna má með að hún muni reyna að bæta það enn frekar í úrslitakeppninni, sem fram fer á mánudaginn.
 
Sjá nánar: www.iaaf.org
meira...

Þórey Edda stökk 4,15 metra og varð í 21-22. sæti í Peking

Þórey Edda Elísdóttir FH keppti í undankeppni stangarstökks kvenna á Ólympíuleikunum í nótt.
Þórey fór yfir byrjunarhæð sína 4,15m í fyrstu tilraun, en felldi síðan næstu hæð 4,30m þrisvar sinnum.
Hún varð í 12. sæti af 18 keppendum í B-hópi og í 21-22. sæti af 36 keppendum með þennan árangur.
20 konur komust yfir 4,30 metra í nótt og 12 stukku yfir 4,50 metra sem dugi til að komast í úrslitakeppnina, sem fram fer á mánudaginn. Þetta eru þriðju Ólympíuleikarnir sem Þórey Edda tekur þátt í, en hún stökk 4,00m á sínum fyrstu leikum í Sydney fyrir átta árum. Fyrir fjórum árum náði Þórey þeim frábæra árangri að verða í 5.sæti, stökk þá 4,55m. Þórey Edda er fyrsta frjálsíþróttakonan sem tekur þátt í þrennum Ólympíuleikum.
 
Sjá nánar: www.iaaf.org
meira...

Bergur Ingi Pétursson keppir í nótt í Peking

Bergur Ingi Pétursson sleggjukastari úr FH keppir í undankeppni sleggjukastsins á Ólympíuleikunum í nótt.
Bergur er í A-hópi, sem hefur keppni kl. 02:40 að íslenskum tíma eða kl. 10:40 í fyrramálið að staðartíma.
Búið er að gefa út að til þess að tryggja sér sæti í úrslitum þurfi að kasta 78,00 metra, ef færri kasta yfir 78 metra þá komast þeir sem eiga 12 lengstu köstin í úrslitakeppnina sem fram fer á sunnudaginn.
 
33 keppendur eru skráðir til leiks í sleggjukastinu, 16 keppa í A-hópi og 17 í B-hópi kl. 04:10 og eiga allir keppendur nema einn betri árangur en Bergur Ingi og 31 hefur kastað lengra á þessu ári. Það er því nokkuð ljóst að möguleikar Bergs á að komast í úrslit eru ekki miklir, en hann sýndi á síðasta móti að hann er í formi og gæti ef allt gengur upp bætt Íslandsmet sitt í greininni, en það er 74,48 metrar frá því í maí sl. Bergur kastaði 73,47 metra sl. sunnudag á móti í Marugame í Japan og átti þá þrjú köst yfir 73 metra.
 
Nánari upplýsingar um keppnina eru að finna á heimasíðu IAAF, en þar eru komnir inn keppendalistar í öllum greinum m.a. spjótkasti og stangarstökki kvenna, en 40 konur eru skráðar í stangarstökkinu á laugardaginn og 56 í spjótkasti kvenna á þriðjudaginn, þar sem þær Þórey Edda og Ásdís Hjálmsdóttir verða á meðal keppenda.
 
Á myndinni hér að ofan er Bergur að óska Þjóðverjanum Markus Esser til hamingu með sigur á móti í Crumbach í Þýskalandi fyrr í sumar, en Markus er eini keppandi Þýskalands í sleggjukastkeppninni á Ólympíuleikunum.
Markus á best 81,10 metra, en hefur kastað lengst 79,97 metra á þessu ári. Hann er í A-hópi eins og Bergur.
 
Sjá nánar: www.iaaf.org
meira...

Bergur Ingi kastaði 71,63 metra í Peking

Bergur Ingi Pétursson FH keppti í nótt í undankeppni sleggjukastsins í Peking í nótt.
Bergur kastaði 69,73m í fyrstu umferð, gerði ógilt í annari umferð og kastaði síðan 71,63m í síðustu umferð.
Hann varð í 13. sæti af 16 keppendum í fyrri kasthópi og í 25. sæti af 33 keppendum í keppninni.
Síðasta sæti inn í úrslit var 75,34 metra, svo Bergur hefði þurft að bæta Íslandsmet sitt um 86 sm til þess að ná því, en Íslandsmet hans er 74,48 metrar frá því fyrr í sumar. Bergur átti næst lakastan árangur af þeim sem kepptu í nótt, svo hann náði að vinna sjö kastara sem áttu betri árangur en hann í keppninni í nótt.
 
Þó svo að Bergur hafi ekki náð að kasta eins langt og hann hefði viljað í nótt, þá er þessi árangur hans á sínu fyrsta stórmóti alveg ásættanlegur og ljóst að með sama áframhaldi verður ekki langt að bíða að hann muni komast í úrslit á stórmótum í framtíðinni, enda er hann aðeins 22 ára og er því rétt að hefja sinn feril sem sleggjukastari.
 
Sjá nánar: www.iaaf.org
meira...

200 keppendur á MÍ 11-14 ára á Laugum um helgina 5

200 keppendur eru skráðir til keppni á Meistaramóti 11-14 ára sem fram fer á Laugum í umsjón HSÞ um helgina.
Forskráningu lauk á miðnætti í nótt og skráðu 16 félög og héraðssambönd keppendur á mótið.
Flestir keppendur koma frá ÍR eða 31, 27 eru frá UMSE, 26 frá HSK og 21 frá heimamönnum í HSÞ.
 
Nú verður í fyrsta sinn keppt í aldursflokki 11 ára stráka og stelpna á mótinu, en samþykkt var á þingi FRÍ í vor að bæta þessum árgangi við. Jöfn og góð skráning er í allar keppnisgreinar mótins og útlit er fyrir skemmtilegt mót á Laugum um helgina í góðu veðri skv. veðurspá fyrir helgina.
 
Nú er verðið að vinna í uppsetningu leikskrár fyrir mótið og ætti hún að vera tilbúin á morgun, fimmtudag og verður þá hægt að skoða hana í mótaforritinu hér á síðunni. Þar er hægt að sjá tímaseðil fyrir keppnina, en mótið hefst kl. 11:00 á laugardagsmorgun og eru áætluð mótslok um kl. 14:30 á sunnudaginn.
 
Nánari upplýsingar um MÍ 11-14 ára eru að finna undir mótaskrá hér á síðunni.
meira...

Frjálsíþróttablaðið kom út í dag

1. tbl. af Frjálsíþróttablaðinu á þessu ári kom út í morgun og var því dreift með Morgunblaðinu í dag.
Þetta er fimmta útgáfuár Frjálsíþróttablaðsins, en gefin hafa verið út 1-2 tbl. á ári síðan 2004.
Blaðið er 24 síður og kennir þar ýmissa grasa að þessu sinni m.a. er mikil umfjöllun um ólympíuþátttöku frjálsíþróttafólks fyrr og nú. Ritstjóri blaðsins að þessu sinni er Jónas Egilsson fyrrverandi formaður FRÍ.
 
Svo er bara að tryggja sér eintak af Morgunblaðinu í dag, en Frjálsíþróttablaðinu verður dreift bæði til áskrifenda og í lausasölu. Hjálagt er mynd af forsíðu Frjálsíþróttablaðsins, en hana prýða ólympíuþátttakendur okkar í Peking, þau
Ásdís Hjálmsdóttir, Bergur Ingi Pétursson og Þórey Edda Elísdóttir.
 
Frjálsíþróttasambandið vill koma á framfæri einni leiðréttingu vegna greinar á bls. 6 í blaðinu, þar sem fjallað er um þátttöku Íslendinga á Ólympíuleikunum frá upphafi. Þar er sagt að Jón Þ. Ólafsson hafi stokkið 2,03 metra í hástökki á leikunum í Mexikó 1968, en rétt er að Jón stökk 2,06 metra.
meira...

Níu valdir til þátttöku á NM unglinga í Bergen

FRÍ hefur valið níu keppendur til að taka þátt í Norðurlandameistaramóti unglinga 19 ára
og yngri, sem fram fer í Bergen um nk. helgi.
 
Neðangreint íþróttafólk hefur verið valið í eftirfarandi keppnisgreinar:
Konur:
* Helga Margrét Þorsteinsdóttir Ármanni, 100m grindahlaup, 400m hl., langstökk, hástökk og kúluvarp.
* Hrafnhild Eir Hermóðsdóttir ÍR, 100m hl. og 200m hl.
* Íris Anna Skúladóttir Fjölni, 1500m hl. og 2000m hindrunarhl.
* Ragnheiður Anna Þórsdóttir FH, kringlukast.
* Sandra Pétursdóttir ÍR, sleggjukast.
* Valdís Anna Þrastardóttir ÍR, spjótkast.
 
Karlar:
* Bjarki Gíslason UFA, stangarstökk.
* Sveinn Elías Elíasson Fjölni, 100m hl., 200m hl. og 400m hl.
* Örn Davíðsson FH, kúluvarp, kringlukast og spjótkast.
 
Mótið fer fram á laugardag og sunnudag. Fararstjórnar og þjálfarar í ferðinni
þau Fríða Rún Þórðardóttir unglingalandsliðsþjálfari FRÍ og Pétur Guðmundsson.
 
Heimasíða mótsins: www.nordicmatch.no
meira...

Íslensk skrif í alþjóðlegt frjálsíþróttarit

Tvær greinar eftir íslenska höfunda eru í nýjasta hefti New Studies in Athletics (NSA). Í ritinu sem er útgefið af Alþjóða frjálsíþróttasambandinu (IAAF) er fjallað um ýmiss málefni frjálsíþrótta, svo sem þjálfun, tæknimál, fræðslu og nú þróun innan hreyfingarinnar.
 
Birgir Guðjónsson, sem átti sæti í lækna- og lyfjanefndum IAAF þar til á síðasta ári, skrifar grein um baráttuna gegn lyfjanotkun innan hreyfingarinnar. Greinin veitir gott yfirlit um sögu og ástæður baráttunnar gegn lyfjanoktun í íþróttum ásamt núverandi ástandi.
IAAF hefur verið leiðandi innan hinnar alþjóðlegu íþróttahreyfingar gegn ólöglegri lyfjanoktun. Jafnframt eru fleiri lyfjapróf tekin innan frjálsíþrótta en í nokkurri annarri íþróttagrein í heiminum í dag.
 
Jónas Egilsson, sem er fyrrverandi formaður FRÍ, fer yfir fyrir sögu og þróun frjálsíþrótta á Íslandi
ásamt núverandi stöðu íþróttarinnar. Þá er fjallað nokkuð ítarlega um nokkra þætti starfseminnar,
svo sem þjálfun, aðstöðu, fræðslu, árangri á alþjóðlega vísu og hina miklu fjölgun Íslandsmeta svo dæmi séu tekin. Greinin er unnin í samvinnu við Bill Glad sem er einn af ritstjórum blaðsins og starfsmaður Frjálsíþróttasambands Evrópu (EA). Þessi grein er fyrsta úttektin sem til stendur að gerði verði á frjálsíþróttastarfsemi víðar í heiminum.
 
NSA er áhugavert rit fyrir þá sem vilja fylgast með umræðu og þróun innan frjálsíþróttanna, hvort sem er um þjálfun, tæknimál eða annað áhugavert frjálsíþróttaefni. Hægt er að fá nánari upplýsingar á heimasíðu IAAF(http://www.iaaf.org/development/studies/index.html) eða óska eftir áskrift hjá starfsmanni sambandsins (vicky@iaaf.org).
meira...

Bergur Ingi kastaði 73,47 metra í Marugame í gær

Bergur Ingi Pétursson sleggjukastari keppti í gær í Marugame í Japan, en íslensku ólympíufararnir hafa dvalið í æfingabúðum þar ásamt þjálfurum sínum frá 5. ágúst sl.
Samkvæmt óstaðfestum fréttum kastaði Bergur Ingi lengst 73,47 metra á mótinu og sigraði, en öll köst hans voru yfir 70 metra, þaraf voru þrjú köst yfir 73 metra. Beðið er eftir staðfestum úrslitum frá mótinu í Marugame í gær.
Aðstæður voru erfiðar til keppni í Marugame, um 40° hiti og mikill raki, kanski ekki ólíkt því sem búast má við að verði á Ólympíuleikvanginum í Peking á föstudaginn. Íslandsmet Bergs Inga er 74,48 metrar.
 
Bergur Ingi hélt í morgun áleiðist til Peking ásamt Eggerti Bogasyni þjálfara sínum, en Bergur Ingi keppir í undankeppni sleggjukastsins á föstudagsmorgun, á fyrsta degi frjálsíþróttakeppni Ólympíuleikana.
meira...

Meistaramót 11-14 ára á Laugum

Meistaramót Íslands 11-14 ára verður haldið á Laugum í Þingeyjarsýslu 16. og 17. ágúst nk.
 
Frestur til skráninga er til miðnættis þriðjudagsins 12. ágúst nk. á Mótaforriti FRÍ. Eftir þann tíma er hægt að skrá þátttakendur, gegn þreföldu skránaingargjaldi "hallibo@hive.is"
 
Breytingar hafa verið gerðar á fyrirkomulagi keppni í 60 m og 100 m hlaupum. Keppt verður í A og B úrslitum, þ.e. keppendur með sex bestu tímana eftir undanrásir fara í A úrslit og þeir sem ná 7. til 12. besta árangri þar á eftir, fara í B úrslit.
 
Nánari upplýsingar um MÍ 11-14 ára eru að finna undir mótaskrá hér á síðunni.
meira...
1 205 206 207 208 209 226
X
X