Agnes með bætingar

Fyrsta mótið var æfingamóti í Ås 14. maí sl. Þar keppti í Agnes í 400m hlaupi og rauf hún 60 sek. múrinn í fyrsta sinnn, hljóp á 59,51 sek. Hún átti áður 61,15 sek. Þann 20. maí keppti Agnes aftur í 400m hlaupi og nú á opnunarmóti í Jessheim í sambandi við Noregsmeistaramótið í boðhlaupum. Hún hljóp nánast keppnislaust á góðri bætingu 59,04 sek. sem er frábært hjá henni, segir í fréttatilkynningu frá HSK.
 
Fimmtudaginn 24. maí var komið að hennar aðalgrein, 800m hlaupi. En Agnesi var þá boðið að keppa á sterku mót á Bislett leikvanginum í Osló, svokölluðu Hyundai Grandprix móti. Þar hljóp hún í sterkum riðli tímanum 2:17,50 mín sem er bæting utanhúss og alveg við  HSK met í  20-22 ára flokki stúlkna en metið er 2:17,3 mín sem Aðalbjörg Hafsteinsdóttir Umf. Selfossi á. HSK metið í kvennaflokki er 2:14,09 mín í eigu Unnar Stefánsdóttur Umf. Samhygð. Utanhúss átti Agnes  2:20,25 mín. Hennar besti innanhúss tími er 2:17,75 mín., sem er HSK met í kvenna- og stúlknaflokki 20-22 ára, segir ennfremur í fréttatilkynningunni.
 
Fjórða mótið sem Agnes keppti á með stuttu millibili var 27. maí í Lilleström þar sem hún keppti í 400m hlaupi. Agnes var ekki að breyta út af vananum heldur bætti sig í þriðja sinn á hálfum mánuði í greininni þegar hún fór vegalengdina á 58,77 sek.
Share on FacebookShare on Google+Tweet about this on TwitterShare on LinkedIn

FRÍ Author