27 ára gamalt piltamet slegið

Dagur Traustason bætti í dag 27 ára gamalt met 15 ára pilta í 1500 metra hlaupi á 3. Origo móti FH sem fram fór í Kaplakrika.

Dagur, sem keppir fyrir FH, kom í mark á 4:18,70 mínútum og bætti piltamet Sveins Margeirssonar sem var 4:19,2 mínútur. Sveinn setti það met árið 1993 og var það því orðið 27 ára gamalt.

Sveinn setti á næstu árum fjölmörg aldursflokkamet og Íslandsmet og varð einn fremsti hlaupari Íslands. Því má segja að Dagur sé mjög efnilegur og spennandi verður að fylgjast með honum á næstu árum.

Dagur Traustason